SudanX سودان اكس

Home
Sudan
Khartoum
SudanX سودان اكس

Call Directions Website

Contact information, map and directions, contact form, opening hours, services, ratings, photos, videos and announcements from SudanX سودان اكس, الخرطوم, Khartoum.

اهلا بيك في سودان إكس - sudanX
Dental student | على طريق الحلم 🦷
ما اتخرجت لسه، لكن اتخرجت في مدرسة الشهامة السودانية✌️❤️🔥
أوثق الواقع السوداني بقوة.. وجعنا، فرحنا، ورجالتنا 🇸🇩

للإعلانات والتعاون التجاري 📩
[email protected]

04/10/2026

ساعات بس.. واسمك ح يظهر في كشف الجامعة..

انت ما منتظر موقع يفتح.. انت منتظر 12 سنة قراية تتختم بكلمة واحدة: تم قبولك..

الحقيقة الما بقولوها ليك:

1. القبول ما هو النهاية.. القبول هو البداية:
طب أو تربية.. الخرطوم أو الأقاليم.. ما فارق.. الشطارة ما في وين شالوك.. الشطارة ح تعمل شنو بعد ما شالوك.. ياما ناس شالوهم طب وفشلو.. وياما ناس شالوهم كليات عادية وبقو اسياد مجالهم ..

2. ما تصدق اي رابط:
الساعات دي أكتر ساعات فيها نصب..
اي زول يقول ليك: تعال خاص بطلع ليك نتيجتك.. ده كذاب..
اي رابط يقول ليك: نتيجة القبول هنا.. ما تفتحو الا من موقع الوزارة الرسمي بس..
ما تدي رقم استمارتك لزول..

3. السيناريوهات التلاتة.. وجهز ليها من هسي:

* السيناريو الأول: شالوك في رغبتك الأولى: ما تجوط.. اسجد سجدة شكر.. وامشي احضن أمك.. ده تعبها هي..
* السيناريو التاني: شالوك في رغبة ما عايزها: عادي.. ده حصل لـ 70% من الطلاب.. القبول العام ما نهاية.. في شواغر.. في خاص.. في تقديم تاني.. ما تيأس..
* السيناريو التالت: ما شالوك؟ ده ما فشل.. ده تأجيل.. لسه في فرصة الشواغر.. ولسه في الخاص.. ولسه ربنا كاتب ليك مكان أحسن..

ح تعمل شنو أول ما النتيجة تظهر؟

1. صور القبول اسكرين.. واطبعو..
2. ما تنزل بوست فرح قبل ما تتأكد من اسمك ورقمك الجامعي كويس..
3. ابدأ جهز أوراقك طوالي: الرقم الوطني.. الشهادة.. صور.. عشان ما تتجهجه بعدين..

والأهم من ده كلو..

نحنا ما ح نخليك بعد القبول..

لأننا شفنا دعمكم.. شفنا حبكم.. شفنا رسائلكم.. وده دين في رقبتنا..

عشان كده قسما.. مكملين معاكم..

من لحظة ما تشوف كلمة “تم قبولك” لحد ما تجيب امتياز في السمستر الأول.. لحد ما تتخرج..

* ح نوريك كيف تختار داخلية كويسة..
* ح نوريك كيف تقرا أول مادة في الجامعة..
* ح نوريك كيف ما تبقى ضحية في سنة أولى..
* ح نوريك كيف تجيب امتياز وانت بتضحك..

انت ما براك.. نحنا معاك..

خليك قريب من التلفون الساعات الجاية.. النتيجة قربت..

وأول ما تظهر.. تعال هنا.. اكتب لينا شالوك وين.. نفرح معاك كلنا..

ابقو عافية.. وابقو مطمنين..

03/10/2026

ده أخطر ظلم ممكن تواجهو في حياتك وما حتفهمو إلا لو قريت جامعة في السودان…

الظلم الأكاديمي

في الجامعة في نوعين من السقوط..
في سقوط لأنك ما قريت، وده بتستاهلو..
وفي سقوط لأن الدكتور قاصدك إنت بالاسم.

آي والله، قاصدك إنت.

طالب سهران ليالي، حافظ المرجع كلمة كلمة، داخل الامتحان مقفل المادة، يطلع مطمئن، النتيجة تجي “راسب”. إجاباتو كلها صح.. لكن اسمو ما عاجب الدكتور.. يا إما اختلف معاهو في محاضرة، يا إما رد عليهو، يا إما بس ما بيستلطفه.

في دكاترة - وما كلهم، في دكاترة قمة في الأخلاق والأمانة - لكن في دكاترة تانين ماخدين المادة كأنها مملكة خاصة. مافي زول ينجح إلا برضاه هو. مافي زول يعبر إلا لو بقي من الحاشية بتاعتو.

والأخطر من ده كلو..

دكتور يسقط دفعة كاملة عشان ما اشتروا كتابو.

ينزل ليك كتاب بي 50 ألف، أو ملزمة معدل عليها من مصادر من قوقل، ويقول ليك “المرجع بتاعي”. ما اشتريتو؟ انت ما حتنجح. حتى لو كتبت ذهب في ورقة الامتحان، حتشيل المادة. بقت تجارة عديل، ما تعليم.

طالب يشيل مادة 3 مرات ما لأنه بليد، لأنه اختلف مع الدكتور في نقاش بسيط. الدكتور شالها ليهو في قلبو وبقى كل سمستر يعيد ليهو نفس الفيلم. مستقبلو واقف، وتخرجو واقف، وحلم أهلو واقف، عشان مزاج دكتور.

يقولو ليك "الجامعة بتربي"..
الجامعة بتربي اي بالعلم، ما بتربي بالحقد وتصفية الحسابات.

الطالب ده لمن يشيل مادة ظلم، هو ما بشيل مادة بس، هو بشيل معاها إحباط، بشيل معاها كره للقراية، بشيل معاها إحساس إنو كل تعبو راح ساي. في طلبة خلت الجامعة عديل بسبب حركة زي دي. وفي طلبة جاها اكتئاب.

يا جماعة التدريس أمانة. الدرجة دي أمانة حتتسئل منها يوم القيامة قبل ما تتسئل منها قدام عميد الكلية.

الطالب ما عدو ليك، الطالب ده أمانة في رقبتك. لو ما قادر تعدل بين الطلبة، خلي الكرسي ده.

أي طالب مر بالظلم ده عارف الوجع ده كويس.

لو حصل ليك الموقف ده، احكيهو في الكومنتات، خلي الناس تعرف الحاصل جوا الجامعات بقى عامل كيف.

02/10/2026

لأي زول شال الشهادة السودانية السنة دي وما حالفه الحظ..

أنا عارف الوجع وين.

عارف إحساس إنك قريت في أصعب سنة مرت على البلد دي. هي ما سنة واحدة.. هي سنين عجاف.. غلاء يقطم الضهر.. جهجهة.. ونفسية تعبانة شديد.. حتى الحاجات البسيطة البتخلي الزول يقرا.. ما كانت متاحة.
عارف إحساس إنك عملت العليك، لكن الظروف كانت أكبر منك.

وعارف الوجع التاني وين..
صحبك الكان معاك في نفس الفصل، الليلة بباركوا ليهو “دخل طب” و “دخل هندسة” وانت ساكت.. ما قادر ترد على الناس.. خايف من سؤال الحلة: “داير تقدم وين ولا ح تعيد؟”

وعارف الوجعة الأكبر.. لما تكون النسبة ما بتوديك الحتة البتحلم بيها، والقروش ذاتها ماف عشان تدخل خاص. تبقى واقف في النص، لا طايل السماء لا طايل الواطة.

اسمعها من اخوك كويس..

ما تحاكم نفسك بنتيجة جات في أسوأ سنين البلد.

الرسوب ابدا ما عيب.
العيب إنك تصدق وتقتنع إنو دي نهايتك هنا. 🔚

يا اخوي ويا اختي.. الإعادة ما معناها إنك بليد.. ابدا والله الإعادة معناها إنك راجل.. معناها إنك بت عندها إرادة.. معناها إنك قررت ما تبيع حلمك بالرخيص.

في ناس كتيرة هسي بتجهز في كتبها.. بنتفض في الغبار من المذكرات.. وبتقول بسم الله نبدأ من جديد. ديل ما فاشلين.. ديل هم الأقوياء الحقيقيين.. ديل الحيعملوا القصة البتتقصة بعدين: “أنا عدت السنة في اسوء ظروف البلد وجبتها”

عشان كدا..

1. أبكي الليلة.. وخلاص. بكرة دا يوم جديد. ما تخلي الحزن يسكن جواك أكتر من يوم.
2. اقفل باب المقارنات نهائيا . قصتك براها وقصة صحبك براو. رزقك ما بمشي لزول تاني.
3. أقعد مع نفسك برواقة.. شوف الغلط كان وين؟ طريقة القراية؟ مادة معينة؟ التوتر؟ عشان ما نكرر نفس الغلطة.
4. من بكرة.. قوم أبدأ. ما تنتظر “نفسياتي ترتاح”. الراحة بتجي وانت بتحفر.

وحتى لو نجحت ونسبتك ما بتدخلك حلمك.. ما ترضى بي اي حاجة أقل من حلمك.. عيدها و الحلم بستاهل. 🏁

سنة واحدة بتعيد فيها.. ممكن تغير باقي عمرك كله. صدقني
سنة واحدة بتكرب فيها.. ممكن تدخلك الجامعة البتحلم بيها وتخلي أهلك يرفعوا راسهم بيك.

انت ما براك.
في آلاف زيك هسي موجوعين وناوين يرجعوا أقوى.

دي ما إعادة سنة.. انا بسميها دي إعادة حلم.

قوم واتنفض.. وأقيف على حيلك.. وورينا حتعملها كيف السنة الجاية.

كلو مكتوب ومقدر.. ويا ما ناس عادت وجابت أعلى نسبة ودخلت أحسن جامعة.

لو بتعرف زول مكسور من النتيجة.. رسل ليهو البوست دا.. يمكن تكون انت السبب البخليهو يرجع يقيف تاني.

02/10/2026

ده بوست النسيان.. البوست الح يوجعك لكن ح يعالجك.. لو بتعاني من النسيان احفظ البوست ده.. لأنه ح يتمسح..

انت ما بتنسى.. المشكلة انك بتقرا غلط..

خلينا نكون واقعيين..

بتقرا 6 ساعات.. تاني يوم بتحس كأنك ما قريت..
بتدخل الامتحان.. المعلومة في راسك لكن ما قادر تطلعها..
بتقرا الصفحة 3 مرات.. وبعد 10 دقايق بتنساها..

دي ما مشكلة ذاكرة.. دي مشكلة سيستم..

90% من الطلاب بعملو نفس الغلطات الـ 5 دي:

1. بتقرا بعينك بس.. ما بمخك:
عينك بتمر على السطور ومخك في الواتساب.. دي اسمها قراءة وهمية..
الحل: اقفل الكتاب.. اسأل نفسك.. انا قريت شنو؟ لو ما قدرت تجاوب.. انت ما قريت اصلاً..
2. تلفونك هو سبب فشلك:
كل 5 دقايق بتفتح التلفون.. مخك كل مرة بحتاج 23 دقيقة عشان يرجع يركز تاني..
الحل الوحشي: خت التلفون في غرفة تانية.. اقفل النت.. اعمل وضع طيران.. 50 دقيقة قراية بدون تلفون = 5 ساعات بتلفون..
3. ما بتنوم.. فمخك ما بحفظ:
الذاكرة ما بتتثبت وانت صاحي.. بتتثبت وانت نايم..
بتساهر للساعة 2 وبتقوم 6؟ انت بتدمر ذاكرتك بيدك..
الحل: 7 ساعات نوم.. ما أقل.. لو ما نمت كويس.. كل القراية راحت ساي..
4. بتقرا اليوم وبتراجع بعد شهر:
مخك بنسى 70% من المعلومة بعد 24 ساعة..
الحل هو القانون الذهبي:

* اليوم الأول: اقرا
* تاني يوم: راجع نص ساعة بس
* بعد 3 أيام: راجع 20 دقيقة
* بعد 7 أيام: راجع ربع ساعه
ده اسمو التكرار المتباعد.. ده البخلي المعلومة ما تطلع تاني نهائي..

5. بتحفظ بدون ما تفهم.. وبتفهم بدون ما تكتب:
القراية الصامتة ما بتنفع..
الحل القاتل:

* افهم بصوت عالي.. كأنك بتشرح لطفل..
* اكتب بيدك.. ما باللابتوب.. الكتابة باليد بتحفر المعلومة 3 مرات أكتر..
* حل أسئلة.. ما ترجع تقرا تاني.. الأسئلة هي البتوريك انت حافظ ولا واهم نفسك..

الروشتة النهائية من أرض الواقع لطلاب الطب بالذات:

1. 50 دقيقة تركيز مجنون + 10 دقايق بريك.. بدون تلفون..
2. أي صفحة تقراها.. اقفلها واكتب أهم 3 نقاط من ذاكرتك..

3. NotebookLM هو سلاحك: أي معلومة بتنساها.. دخلها NotebookLM.. هو ح يذكرك بيها قبل ما تنساها..
4. ما تقرا وانت مضغوط ومتوتر: التوتر بفرز كورتيزول..

الكورتيزول بقتل الذاكرة.. قوم اتوضا.. صلي.. امشي 10 دقايق.. وارجع اقرا..

5. التكرار هو الملك: ما تقول فهمت.. قول كررت كم مرة؟ المعلومة عشان تثبت محتاجة 3 تكرارات على الأقل..

الخلاصة عشان نقفل موضوع النسيان ده :

انت ما غبي.. وما ذاكرتك ضعيفة..
انت بس بتقرا بطريقة بتاعت ثانوي.. والجامعة عايزة طريقة بتاعت جامعة..

بطل قراية وهمية.. بطل سهر.. بطل تلفون جنبك..

ابدأ من الليلة.. طبق كلامي ده لمدة 7 أيام بس.. وح تشوف الفرق..

لو البوست ده لمسك.. اعمل شير لزول بعاني من نفس المشكلة.. وانا بوعدك.. البوست الجاي ح أديك جدول المراجعة الحرفي البخليك ما تنسى تاني..

ملاحظة أخيرة:
النظام ده ما حقّي أنا.. ده مبني على دراسات علمية مثبتة (التكرار المتباعد + الاسترجاع النشط + النوم).. أنا بس طبّقتو ولخّصتو ليك من أرض الواقع.

#النسيان #التركيز

02/10/2026

الآيباد للطلاب.. هل هو رفاهية ولا بعزك؟

الحقيقة من أرض الواقع:

الآيباد ما بديل للابتوب.. هو سلاح جنب الابتوب..
الابتوب للبحث والكتابة والبرامج التقيلة..
الآيباد للمذاكرة اليومية.. للكتب.. للمحاضرات.. للحفظ..

لو بتقرا طب أو هندسة وبتشيل 10 كتب PDF ومذكرات مطبوعة.. الآيباد ح يوفر ليك 70% من تعبك..

كيف بعزك؟

1. بتكتب فوق المحاضرة مباشرة: الدكتور بشرح وانت بتكتب بالقلم فوق الـ PDF.. ما بتنقل تاني.. دي براها بتخليك تفهم أسرع.
2. كل كتبك في جهاز واحد 500 جرام: بدل شنطة 10 كيلو..
3. تركيز عالي: ما فيهو زحمة الابتوب.. تفتح GoodNotes وتقرا.. بس..
4. المراجعة قبل الامتحان: بتعمل Search لكلمة واحدة في 1000 صفحة في ثانية.. بدل تقلب الكتاب ساعة.

الاشتراكات؟ ما غالية زي ما الناس فاكرة..

دي التطبيقات البتستخدمها فعلاً:

* GoodNotes 6 / Notability: 3-4 دولار في الشهر.. مرة واحدة وخلاص.
* Anki Pro / Quizlet Plus: 3 دولار..
* Anatomy / 3D Heart: 5-10 دولار في الشهر وبتشترك مع 2 من دفعتك..
* LiquidText / CollaNote: مجاني أو 5 دولار..

يعني الشهر كلو لو بتستخدم 3 تطبيقات تقيلة.. بتدفع ليك 10-15 دولار.. أقل من حق التصوير والطباعة..

طيب تشتري ياتو نوع؟ دي التشكيلة الحالية في 2026:

السوق الآن فيهو 4 أنواع أساسية:

1. آيباد 9 (iPad 9th Gen - 2021):
ملك الطلاب الغلابة.. أكتر آيباد منتشر في الجامعات.. مستعمل نضيف بتلقاهو 800-900 الف.. بشغل GoodNotes و PDF زي الحلاوة.. بطاريتو حلوة.. عيبو شاشتو قديمة وحواف كبيرة.. لكن كبداية ممتاز وبعزك 100%.
2. آيباد 10 (iPad 10th Gen - 2022):
الترند الحالي عند البنات.. شكلو جديد وألوانو سمحة.. ببدأ مستعمل مليار ونص-2 مليار.. شاشة كبيرة 10.9 بوصة و Type-C.. بكفي لحد سنة رابعة مرتاح.. ده البشوفو في يد 70% من طلاب الطب.
3. آيباد إير 5 (iPad Air 5 - M1 - 2022):
الخيار الذهبي للمستريحين.. مستعمل 2.5 مليار.. شريحة M1 طيارة بتقعد معاك 5 سنين لي قدام.. خفيف وشاشتو 120% أحسن من العادي.. بدعم Apple Pencil 2 وكل تطبيقات الطب التقيلة.. ده البنصح بيهو أي زول وضعو كويس.
4. آيباد برو 2020 / 2021 (Pro M1 - 11 inch):
وحش السوق المستعمل.. بتلقاهو 2-3 مليار.. 120Hz بتخلي الكتابة بالقلم زي الورق الحقيقي.. 4 سماعات وصوت خرافي للمحاضرات.. لو لقيت واحد نضيف بطارية فوق 85%.. شيلو وانت مغمض.. بقعد معاك للماستر

الخلاصة العملية:
• قروشك بسيطة وعايز تبدا؟ iPad 9
• عايز شكل جديد وسعر متوسط؟ iPad 10
• وضعك كويس وعايز جهاز يريحك 5 سنين؟ Air 5 M1
• لقيت فرصة برو مستعمل نضيف؟ Pro 2021 M1 ده صفقة العمر.
ما تجري ورا الأحدث.. شوف البنفع مع جيبك وبعزك في القراية..

* ما تجيب آيباد لو: ما عندك لابتوب أساسي.. أو ما بتحب تكتب بالقلم.. ح يبقى ليك يوتيوب بس..

الآيباد ما بجيب ليك امتياز.. لكن بخلي طريق الامتياز أقصر وأريح بكتير..

#دراسة

احفظ البوست ده.. ح تحتاجو لما تنزل تشتري..

02/10/2026

ده بوست الامتياز.. بدون تلطيف.. بدون تحفيز..
لو GPA بتاعك 2.5 و 3 و داير 4 .. ده البوست الح يألمك لكن ح ينجحك..

كيف تجيب امتياز في المجالات الطبية؟ GPA 4 .. من أرض الواقع..

1. أول حاجة.. بطل وهم “بقرا لما يكون عندي مزاج”

ناس الامتياز ما عندهم مزاج.. عندهم سيستم..
ما في حاجة اسمها الليلة ما قاري لي.. ما في حاجة اسمها بكرا بعوض..
المادة البتاخدها الليلة.. لازم تتقري الليلة.. في نفس اليوم.. قبل ما تنوم..
القاعدة الذهبية: محاضرة اليوم = مراجعة اليوم.. ما عملت كده.. ح تتراكم وح تسقط..

2. بتقرا كم ساعة؟

ما تغش نفسك.. امتياز ما بجي بساعتين..
8 ساعات قراية صافية في اليوم.. غير ساعات الجامعة..
8 ساعات انت وقاعد في الكرسي وتلفونك مقفول..
موزعة كده: 3 الصباح.. 3 العصر.. 2 بالليل..
أقل من 8 ساعات.. انت بتنافس على جيد جدا.. ما امتياز..
وأكثر من 8 ساعات.. انت بتحرق.. ح تقطع بعد أسبوعين..

3. بتقرا وين؟

ما تقرا في السرير.. وما تقرا مع شلتك..
عندك مكانين بس:
أ. المكتبة: من 8 لـ 2 .. ده مكان الحفظ والتركيز العالي....
ب. غرفتك: لكن مكتب فاضي.. كرسي.. إضاءة بيضاء.. وتلفونك في الشنطة برا الغرفة..

لو بتقرا في السرير.. ح تنوم..
لو بتقرا في الكفتريا.. انت بتتونس ما بتقرا..

4. بتقرا كيف؟ دي أهم نقطة..

طريقة 99% من الطلاب غلط.. بقرا وبيأشر وبقول حفظت.. ده ما قراية.. ده الوهم زاتو..

طريقة الامتياز واحدة بس مافي منها اتنين:

الخطوة 1: افهم قبل ما تحفظ..
افتح اليوتيوب.. افهم المحاضرة في 30 دقيقة.. ما تدخل تحفظ وانت ما فاهم..
لو ما فهمت الـ Concept .. الحفظ ح يطير بعد يومين..

الخطوة 2: احفظ بـ Active Recall..
ما تقرا وتعيد القراية.. اقفل الكتاب واسأل نفسك..
جيب ورقة بيضاء.. اكتب كل التتذكرتو.. الحاجة الما اتذكرتها.. دي الحاجة الما حافظها.. ارجع ليها بس..
القراية البتخليك تفتح الكتاب كتير.. قراية فاشلة..

الخطوة 3: كرر بذكاء..
المحاضرة لازم تتراجع 3 مرات:

* مرة أول يوم
* مرة بعد 3 يوم
* مرة قبل الامتحان بأسبوع

لو ما كررت.. ح تنسى 80% بعد أسبوع.. وده معروف كلام علم ما كلامي..

5. نظام الامتحان..

ناس الامتياز ببدو للفاينل من الأسبوع التالت.. ما قبل الفاينل بأسبوع..
كل جمعة.. تراجع كل القريتو في الأسبوع.. بدون جمعة مراجعة.. انت بتضيع..

وقبل الامتحان بيومين.. ما تقرا جديد.. حل أسئلة.. أسئلة سنين فاتت.. أسئلة الدكتور.. أسئلة.. أسئلة.. أسئلة..
الطب ومجالاته ما بتحب الزول الحافظ الكتاب حفظ.. بتحب الزول الحافظ طريقة الأسئلة..

الزيتونة النهائية لي موضوع الامتياز ده:

* تلفونك 3 ساعات في اليوم بس.. أكتر من كده.. انسى الامتياز..
* شلتك لازم تكون ناس بتقرا.. شلة الجبنات بتجيب ليك ملاحق..
* النوم 6 ساعات بس.. من 11 لـ 5 .. نوم أكتر من كده.. انت بتضيع زمن..
* ما تقارن نفسك بزول بقرا ساعتين وبجيب امتياز.. ده ذكي..
انت لازم تتعب..

الامتياز ما ذكاء.. الامتياز سيستم وسجن.. بتدخل السجن ده 4 شهور.. بتطلع بـ GPA 4..

لو ما مستعد للسجن ده.. خليك في الـ 3.. وارتاح..

لو مستعد.. احفظ البوست ده.. وابدأ من بكرا.. ما من الأسبوع الجاي..

منشن زول داير امتياز.. وخليهو يصحى..
البوست الجاي: جدول الـ 8 ساعات البجيب 4 GPA

#طب

01/10/2026

ده الجزء التاني المنتظر.. الجزء الحقيقي.. ..
طب الأسنان.. من أرض الواقع.. بعيد عن كلام اليوتيوب..

لو الجزء الأول كان عن هل التخصص بنفع معاك ولا لا.. الجزء ده عن بعد ما تدخل.. ح يحصل ليك شنو؟

1. الدراسة كيف؟ والصعوبة الحقيقية وين؟

ما ح اكذب عليك.. طب الأسنان ما أسهل من الطب.. هو نفس الضغط لكن في مساحة أصغر..

أول سنتين: ما ح تمسك أسنان.. ح تمسك كتب بس ..
ح تقرا أناتومي.. جنرال أناتومي الجسم كلو.. + ح تقرا Head & Neck Anatomy .. وده أصعب أناتومي ممكن تلاقيهو.. عصب طالع من وين.. داخل وين.. شريان ماشي جنب شنو.. كلها في مساحة 20 سم.. أي غلطة فيها بتودي وش المريض..
ح تقرا فسيولوجي.. بايو.. هستولوجي.. باثولوجي.. وكلها حفظها تقيل..

من سنة تالتة: بتبدأ المتعة والتعب الحقيقي..
مواد زي:
Dental Materials: بتحفظ 100 مادة.. كل مادة بتتفاعل كيف.. بتنشف في كم ثانية.. قوتها كم..
Operative & Prostho: هنا بتبدأ تنحت بيدك.. شغل نحت الأسنان بالشمع ده براهو بكرهك حياتك.. لو ما يدك ثابتة وصبرك طويل ما ح تمشي..

القراية فيهو 70% عملي.. 30% نظري.. يعني ما ح تقرا من الكتاب وتدخل الامتحان.. ح تشتغل بيدك.. وكل شغلك بتقيم بالملي..

هل هو صعب؟ أيوة صعب.. وصعوبتو ما في الحفظ بس.. صعوبتو في انك لازم تكون حافظ وفنان في نفس الوقت..

2. نقطة الأدوات وتكلفتها - سنة تالتة..

سنة تالتة دي ما سنة قراية بس.. دي سنة بتشتري فيها عيادة في شنطتك..
ح يطلبو منك Kit كامل: طقم تشخيص + أدوات نحت شمع + أدوات حشوات + بورات + Articulator..

التكلفة صادمة:
في مصر: 15 ألف جنيه مصري كبداية..
في السودان: 2 مليار وزيادة مع الوضع الحالي.. وكل مادة عندها أدوات براها وبتتكسر وتشتريها تاني..

يعني مصاريف الأدوات أغلى من رسوم الجامعة.. لازم تعمل حسابها من بدري.

3. الشغل كيف؟ هل ح أتخرج وألقى شغل طوالي؟

دي النقطة البخافو يقولوها ليكم..

الحقيقة:
لا.. ما ح تلقى شغل طوالي.. ولا ح تفتح عيادة طوالي..

طب الأسنان في السودان وبرا السودان بقى فيهو زحمة شديدة.. الخريجين كتار..

بعد ما تتخرج ح تمر بمرحلتين:
أ. الامتياز: سنة كاملة بتشتغل في المستشفى بمرتب بسيط جدا.. وده إجباري..
ب. الخدمة والترخيص: لازم تمتحن امتحان مزاولة المهنة.. وبعدو ح تفتش شغل..

الشغل في البداية في المستوصفات الخاصة.. ومرتباتها ضعيفة.. بتشتغل كتير عشان تتعلم.. أول سنة سنتين انت بتدفع من جيبك عشان تتعلم كورسات.. كورس زراعة.. كورس تقويم.. كورس حشوات تجميلية..

العيادة الخاصة؟ ما بتفتحها أول ما تتخرج.. العيادة دايرة قروش كتيرة.. كرسي الأسنان براهو بي 7-8 ألف دولار.. والمواد غالية.. ونص الناس ما عندها ثقافة تمشي دكتور أسنان إلا للخلع.. فالبداية صعبة..

4. الرواتب كيف؟ من أرض الواقع..

ح اديك ليها بي بلغة السوق.. بشفافية..

في السودان (قبل الحرب والوضع الحالي): مرتب طبيب الامتياز والعمومي كان بسيط شديد.. ما بغطي مواصلاتو.. الناس كانت بتعتمد على البرايفت أكتر..
طبيب عندو خبرة 3-4 سنين وشغال كويس في مستوصف محترم في الخرطوم كان بعمل قروش كويسة.. لكن بعد تعب..

برا السودان - مصر / السعودية / الخليج:
الرواتب هنا كويسة لكن المنافسة نار..
في مصر مثلا لازم تعادل شهادتك وتمتحن.. وبعدو ح تشتغل بمرتب متوسط في الأول.. 8-12 ألف جنيه مصري كبداية.. وبتزيد مع خبرتك وشطارتك..
في الخليج الرواتب ممتازة.. لكن ما بشيلوك إلا وانت عندك ماجستير وخبرة 3 سنين على الأقل..

الخلاصة بالنسبة للقروش :
طب الأسنان ما بجيب قروش سريعة.. بجيب قروش بعد 5 سنين من التخرج…. بعد ما تبقى شاطر ومعروف..
لو داير قروش بعد التخرج طوالي.. ده ما تخصصك..
لو داير استثمار طويل الأمد.. يدك تبقى دهب والناس تجيك بالاسم.. ده تخصصك..

5. هل أدخلو ولا لا؟

أدخلو لو:

* يدك ثابتة وبتحب الشغل اليدوي الدقيق..
* صبور.. بتقدر تقعد 3 ساعات في سن واحد..
* بتحب تشوف نتيجة شغلك طوالي.. قبل وبعد..
* مستعد تتعب أول 5 سنين بعد تتخرج بدون قروش كتيرة..

ما تدخلو لو:

* داير قروش سريعة بعد التخرج..
* بتكره الحفظ الكتير والشغل الدقيق..
* يدك بترجف وما بتحب تشتغل بيدك..

وده الكلام البتمنى زول كان قالو لي قبل ما أدخل..

التخصص سمح شديد.. ومستقبلو حلو.. لكن داير صبر ونفس طويل.. وداير زول يحبو بالجد.. ما عشان الاسم “دكتور أسنان”..

لو البوست ده فادك.. رسلو لزول محتار بين أسنان وطب وصيدلة.. انت ح تنقذو من قرار غلط ح يندم عليهو 5 سنين..

الجزء التالت ح أتكلم عن كيف تقرا Head & Neck بجودة عالية.. وكيف تجيب فيهو A..

احفظ البوست ده.. ح تحتاجو..

30/09/2026

لو انت برلوم شهادة سودانية نازل أول سنة.. و داير تسقط سقوط حر.. اعمل ديل:

خطة السقوط المدوي في الترم الأول

1. أول حاجة.. ما تسأل السناير نهائي..
أوعك تسأل زول قدامك.. اعتبر نفسك فاهم كل شي..
السنير ده عدو.. ما تسألو بنقرا من وين؟ بنراجع كيف؟ الدكتور ده بجيب الامتحان من وين؟
خليك براك.. وألبس الحيطة براك..
أي برلوم ما بسأل.. بسقط أول واحد..

2. خليك تايه في المصادر..
ما تعرف ح تقرا من وين.. مرة من الـ PDF.. مرة من تصوير زميلك.. مرة من اليوتيوب..
ما تحدد مصدرك من أول أسبوع..
أهم شي تكون تايه.. الكتاب ما عارفو.. الشيت ما عارفو.. المرجع ما عارفو..
الطالب التايه.. راسب..

3. أول ما تنزل الجامعة.. اعمل شلليات وانسى القراية..
دي أهم نقطة..
أول أسبوع ده ما للقراية.. ده للشلليات.. للجبنات.. للونسات..
اتعرف على 50 نفر.. واقعد من كفتريا لكفتريا.. والمحاضرة تحضرها وانت بتتونس..
القراية خليها.. الشلة أهم..
والشلة دي هي الح تخليك تشيل 3 مواد وانت بتضحك..

4. احفظ صم بدون تفهم... وما تدخل المكتبة نهائي..
أوعك تمشي المكتبة.. المكتبة دي للمظاهر بس..
وما تفهم الدكتور حدد المهم شنو من المحاضرة.. الغاية بتاعت الدرس شنو؟ ما مهم..
وما تطبع شيتاتك أول بأول.. خليها تتراكم لحد قبل الامتحان بي يومين تلاته.. بعدين فكر..

5. خليك تايه بين المصطلحات الإنجليزية..
جاي من شهادة عربية وشهادة سودانية.. وفجأة كل شي بالإنجليزي..
اعمل فيها ما محتاج تترجم.. ما تحفظ مصطلح.. ما تعمل ليك دفتر مصطلحات..
خليك كل محاضرة بتسمع كلمات جديدة وما فاهمها.. وبعد شهر ح تلقى نفسك ما فاهم ولا كلمة..

6. اقرا ساعتين بس ونوم..
انت متعود في تالتة بتقرا 10 ساعات..
هنا اقرا ليك ساعتين في اليوم واعتبر نفسك اجتهدت.. وباقي اليوم كملو في التلفون..
نظام الجامعة ما زي المدرسة.. ساعتين ما بتعمل ليك حاجة.. الساعتين ديل ما حتأكلك عيش في اول الجامعة…
⸻

الخلاصة يا برلوم..

لو عملت الـ 6 حاجات ديل.. أنا بضمن ليك.. الترم الأول ح تشيلو ملاحق.. وح تكره الجامعة.. وح تقول الجامعة صعبة..

الجامعة ما صعبة.. انت العملت كده في نفسك..

عايز تنجح؟ اعكس أي نقطة قلتها فوق..

اعكسها هسع قبل ما تقع..

اسأل السناير.. حدد مصادرك من أول يوم.. المكتبة هي بيتك.. اطبع شيتاتك أول بأول.. اعمل دفتر مصطلحات انجليزي.. واقرا بنظام جديد..

البوست ده احفظو.. لانو بعد شهرين ح تتذكر كلامي ده وانت جوا القاعة..

منشن برلوم نازل أول سنة.. وانقذو قبل ما يسقط..

#البرلوم

30/09/2026

يا جماعة أنا ما بنك الخرطوم.. أنا طالب زيي زيكم..

من الصباح الخاص حقي عامل كده:

* “يا دكترة كم لايك وتشتري لي تلفون؟”
* “داير اجرب معاك الترند كم لايك وتحول لي 100 ألف”
* “كم لايك وترسل لي لابتوب”

يا جماعة دقيقة.. انتو فاكريني منو؟

أنا والله زيي زيكم وأكعب شوية كمان..

أنا بفتح السوشال ميديا دي بنزل ليكم معلومة.. معلومتين.. من الواقع.. وبقفل برجع لقرايتي.. ما عندي شغل ولا عندي شركة ولا عندي دهب في البيت..

انتو بتشوفو اللايكات بتفتكروها قروش؟
اللايك ده ما بتحول بنكك والله..
اللايك ده قلب أحمر بس.. ما بشتري رغيفة..

أنا لايكاتي كتيرة لكن جيبي فاضي.. ودي هي المعادلة بتاعت صانع المحتوى السوداني..
مشهور وفقران في نفس اللحظة..

فـ بالله.. الناس البتدخل لي خاص..

لو داير معلومة عن القراية.. عن الجامعات والتخصصات.. عن كيف تقرا.. من عيوني الاتنين.. برد عليك..

خلونا نبقى خفيفين على بعض يا جماعة.. كلنا في الهوا سوا..

+ أنا ما خالد العليان .. خالد في بورتسودان.. 😂

29/09/2026

أكل الجامعة ح يحدد ح تتخرج ولا ح تعيد.. بوست الأكل للبرلوم..

ما تقول لي بقرا 10 ساعات.. لو أكلك كعب ما ح تفهم سطر..

ده واقع شفناه.. في الداخلية.. وفي بيوت العزابة..

أولاً: أكل الداخلية..

أكل الداخلية ده بخليك على قيد الحياة.. لكن ما بقريك..
رز.. عدس.. ملاح... زيتو كتير.. ملحو كتير.. ونضافتو انت وحظك..
بتاكل وبطنك بتتملي.. لكن مخك بكون فاضي.. بعد ساعة بتجوع و بتنعس في المحاضرة..او في اول ساعة قراية.

لو ساكن داخلية.. ما تعتمد عليهو 100%..
خلي عندك صندوقك الخاص... فيهو الحاجات البتديك طاقة..

ثانياً: كارثة بيوت العزابة..

هنا المصيبة الكبيرة..
4 شباب او بنات في غرفة.. ما في زول داير يطبخ.. كلكم معتمدين على:
أندومي.. شاورما من الشارع.. طعمية .. بيبسي.. سندات..

ده أكل وسخان.. بخليك تعبان.. بطنك مليانة غازات.. وشك مضلم.. ما قادر تركز.. بتنوم كتير وبتفهم قليل..

الأكل الوسخان ده هو البسقطك.. ما صعوبة القراية..

الطالب الشاطر.. أكلو نضيف..

مخك ده زي المكنة.. بتديهو بنزين نضيف بدور.. بتديهو بنزين وسخان بقطع..

وانت بتقرا حاجات تقيلة زي الطب والهندسة.. مخك داير بنزين سوبر..

ديل أسلحة البرلوم الشاطر.. رخيصة وبتدي طاقة حقيقية:

1. التمر (البلح):
ده سلاح الطلاب الأوائل.. 3 بلحات الصباح مع موية.. بدوك طاقة 4 ساعات بدون تعب.. سكر نضيف للمخ.. أرخص من البيبسي وأنضف منو مليون مرة.. خلي كيس بلح في دولابك..

2. الفول السوداني (الفول المدمس):
بروتين الغلابة.. بثبت ليك بطنك.. بخليك شبعان ومركز.. كيس فول سوداني ب 3000 بديك طاقة يوم كامل.. أحسن من الشيبس واللغاويس..

3. الفول المصري والعدس والبيض:
ديل التلاتة حبات البتبني بيهم جسمك..
فتة فول = قراية 3 ساعات بتركيز..
بيضتين مسلوقة = مخك صاحي..
ما تقول لي ما عندي زمن.. الفول والبيض بتعمل في 10 دقايق..

4. الموية:
90% من الطلاب البقولو “ما قادر أركز” هم عطشانين..
ما بتشرب موية.. بتشرب شاي وسكر..
خلي معاك باغة موية 2 لتر.. اشربها كلها في اليوم.. ح تشوف الفرق في الحفظ..

نظام الميزانية للعزابة - من أرض الواقع:

الوضع الراهن صعب.. عارفين..
ما بقول ليك أكل تفاح وأفوكادو..

* أعملو جدول طبخ في البيت.. كل يوم زول يطبخ.. كده بتوفرو 70%..
* بدل تطلبو دليفري بمبلغ وقدره دي بتطبخو حلة تكفي يومين..
* يوم الجمعة أعملو حلتين كبار.. قسموها في التلاجة.. باقي الأسبوع تسخين بس..

تبعد من شنو لو داير تتفوق:

* الأندومي بالليل.. ده بليد..
* البيبسي والمشروبات الغازية ومشروبات الطاقة مع القراية.. بدوك طاقة 10 دقايق وبعدها بتهبط..
* الأكل من الشارع المكشوف ...
* السهر مع أكل تقيل.. ح تنوم والمادة ما ح تدخل راسك..

90% من ناس القولون والمعدة والمريء.. المرض بدا معاهم من أكل المطاعم أيام الجامعة..

الخلاصة الحاسمة:

في الجامعة في نوعين من الطلاب..
طالب بطنو مليانة أكل وسخان.. ومخو فاضي..
وطالب أكلو نضيف وبسيط.. ومخو مليان..

القراية ما بتحتاج مصاريف كتيرة.. بتحتاج أكل نضيف..
3 بلحات.. وكباية موية.. وصحن فول.. بتعمل ليك شغل ما بعملو ليك شاورما ب 20الف...

أكل نضيف = مخ نضيف = قراية نضيفة = شهادة نضيفة..

اللهم قد بلغت..

احفظ البوست ده.. ح ترجع ليهو أول يوم ليك في الداخلية..

منشن زول ساكن عزابة وأكلو كلو أندومي.. أنقذو قبل ما يسقط 👇

Address

الخرطوم
Khartoum
سوداناكس

Telephone

+249962146538

Website

https://www.tiktok.com/@.sudanx?is_from_webapp=1&sender_device=pc

Alerts

Be the first to know and let us send you an email when SudanX سودان اكس posts news and promotions. Your email address will not be used for any other purpose, and you can unsubscribe at any time.