26/03/2026
-
असोज २६, २०७५ साल। दशैं नजिकिँदै थियो। कान्तिपुर साप्ताहिक का लागि के कन्टेन्ट लेख्ने भन्ने सोचमै अलमल परिरहेको थिएँ। त्यही बेला केही दिनदेखि गायक योगेश्वर अमात्यसँग भेट्ने कुरा भइरहेको थियो। अलमल परिररेका वेला मैले गायक अमात्यलाई फोन गरें, उहांले तुरुन्तै बोलाउनुभयो ।
म थापाथलीस्थित अफिसबाट दरबारमार्ग पुगेँ। बिहान करिब ११ बजेतिर Sam’s One Tree Café पुग्दा अमात्य दाइ त्यहाँ पहिले नै आइपुगिसक्नुभएको रहेछ।
भेट्नेबित्तिकै उहाँले सोध्नुभयो—
तपाईं कुन ब्रान्ड खानुहुन्छ?
म सहजै भनें—
अमेरिकानो।
त्यसपछि उहाँ हाँस्दै भन्नुभयो—
मैले त दारु कुन खानुहुन्छ भनेर सोधेको, कफी होइन नि भाइ!
बिहानको चिया खाने बेला दारुको अफर आएपछि म एकछिन निकै हाँसेँ। म त एकदमै सोझो मान्छे, बिहानै दारुको कुरा सुनेपछि गफको विषय पनि भेट्टाइहालें। उहाँले केही लिनुभयो, मैले भने लस्सी लिएँ। टेबलमा टन्नै खाजा पनि आइहाल्यो।
गायक अमात्यलाई दारु राम्रैसंग मन पर्छ भन्ने कुरा त सुनेको थिएँ। तर, देखेको थिएन । धेरैले भनेकको कुरा - उहाँको स्वभाव नै त्यस्तै—दारु पिउन न त समयले छेक्छ, न दिनले।
करिब एक घण्टा जति गफ गरेपछि मैले भनें— दाइ, यही विषयमा म एउटा interview जस्तो कन्टेन्ट साप्ताहिकमा राख्छु है?
उहाँले हाँस्दै भन्नुभयो—
‘भइहाल्छ नि भाइ, अझै एउटा लस्सी पिउँछौ कि ?’
म दोस्रो लटमा जुस पिएँ। तर तेस्रो लट अर्डर गर्न लाग्नुभएपछि म त्यहाँबाट भागेँ।
खानपिनको कुरा आयो भने उहाँलाई कसैले जित्दैन भन्ने कुरा त्यही दिन प्रमाणित भयो। सायद करोडपति भएर पनि होला—न पैसाको चिन्ता, न अरू कुनै कुरा। दरबारमार्गमा १०–१२ वटा घर उहांका छन् भन्ने पनि सुनेको थिएँ, तर त्यस्ता व्यक्तिगत कुरा सोध्न म लागिनँ।
यो भेटपछी अफिस फर्केर मैले ‘दारु वार्ता’ तयार गरें। केही दिनमै कान्तिपुर साप्ताहिक मा यो छापियो। र, त्यो इंटरभ्यु निकै हिट भयो।
कस्तो थियो त्यो वार्ता ? तल पेपरको कटिङ छ, हेर्नुस् है।
