08/09/2026
#အလင်္ကာကျော်စွာစောင်းဦးဘသန်းအတ္ထုပ္ပတ္တိ
(အပိုင်း ၅ အဆက်)
(ဂ) #ပန်တျာမူမှန်ဖြစ်ရေး
ကျွန်တော်၏တာဝန်များမှာ သီချင်းကြီးသီချင်းခံစာသားတီးကွက်တို့ကို တသမတ်တည်းဖြစ်ရန် ရှာဖွေပြုစုအသံသွင်းရသည်။ တိတ်ခွေထဲအသံသွင်းပြီး အထက်အောက်မြန်မာပြည်ရှိ ဂီတပညာရှင်ကြီးများနှင့် ညှိနှိုင်းရလေသည်။
အတည်ပြုပြီးသောသီချင်းများကို သင်္ကေတဖြင့်
ရေးကာ နိုင်ငံတော်မူအဖြစ်ဆောင်ရွက်ရပါသည်။
၎င်းပြင် ယဉ်ကျေးမှုပြဇာတ်၊ ယဉ်ကျေးမှုကပွဲဌာနကိုလည်း တွဲဖက်ဆောင်ရွက်ရပါသည်။
ပန်တျာကျောင်းများကိုမူ သုံးလတစ်ကြိမ်သွားရောက် စစ်ဆေးရပါသည်။
ရှင်းရှင်းဝန်ခံရပါက ပန်းချီပညာကိုယနေ့တိုင်
နားမလည်ပါ။ ပန်တျာကျောင်းနည်းပြဆရာများ
ခန့်ပြီးကာစအချိန်တွင် ကျောင်းစစ်ဆေးရန် ကျွန်တော်မန္တလေးသို့ ရောက်ရှိစဉ် ကျွန်တော်တည်းခိုနေသော ဧည့်ရိပ်သာသို့ ဒေါ်လှလေးစိန်တို့ သားအဖနှစ်ယောက် ရောက်လာကြသည်။
အဆိုနည်းပြနေရာတစ်နေရာအတွက် ဒေါ်လှလေးစိန်ကို ခေါ်ယူစစ်ဆေးခြင်းမပြုဘဲ ဦးထူးကိုခန့်လိုက်သည့်ကိစ္စနှင့်ပတ်သက်၍ ကျွန်တော့်ထံသို့ ရောက်လာကြခြင်းဖြစ်၏။ ပန်တျာကျောင်းသို့ သွားပြန်တော့လည်း
ပန်တျာကျောင်းအုပ်ဦးစိန်ညွန့်က သူ့ပြဿနာကိုတင်ပြ၏။ ကျောင်းအုပ်ချင်းအတူတူ မန္တလေးကျောင်းအုပ်က လစာရင်း ၂ဝဝ ကျပ်၊ အုပ်ချုပ်ခက ၁၀၀ကျပ်သာရပေသည်။
ရန်ကုန်ပန်တျာကျောင်းအုပ် ဦးခင်မောင်၏လစာမှာ ၃၅၀ကျပ်နှင့်+ရှားပါးစရိတ် နှစ်ခုပေါင်းဖြစ်သည်။
ထိုကိစ္စမှာ ဥပဒေနှင့်မညီသည့်အတွက် ကျွန်တော်
ရန်ကုန်ပြန်ရောက်၍ အစီရင်ခံစာရေးသည့်အခါ အစီရင်ခံစာ၌ _
မန္တလေးမြို့ပန်တျာကျောင်းကိုစစ်ဆေးခဲ့ရာ အဆိုသင်တန်းတွင် အမျိုးသမီး၊အမျိုးသားများ ပေါင်းစပ်နေပါသည်။ နည်းပြဆရာမှာ အမျိုးသားဖြစ်နေ၍ အမျိုးသားတို့ဆိုပုံဆိုနည်း၊အမျိုးသားများ၏အာ၊ လေယူလေသိမ်း ဖြစ်နေပါသည်။ သို့အတွက် အမျိုးသမီးဆရာတစ်ဦးလိုအပ်နေပါသည်။
လစာ ၂ဝဝကျပ်+ရှားပါးစရိတ်ဖြင့် ခန့်အပ်ပေးပါရန် ...ဟု ဒေါ်လှလေးစိန်အတွက် ထည့်သွင်းရေးသားလိုက်ပါသည်။
ဦးစိန်ညွှန့်ကိစ္စကိုလည်း ရန်ကုန်ပန်တျာကျောင်းအုပ်နှင့်နှိုင်းယှဉ်ပြပြီး အစီရင်ခံစာရေးသားရာ ကိစ္စနှစ်ခုစလုံး ချောမောစွာအောင်မြင်ခဲ့သည်။
ပန်းချီသင်တန်းကိစ္စကိုကား ရှည်ရှည်မရေးသားပဲ ကျောင်းသားများသည် ခဲတံနှင့် ဘူးသီးပုံရေးဆွဲထားသည်မှာ ဘူးသီးနှင့်တူနေတာတွေ့ခဲ့ရပါသည်ဟု ရေးသားလိုက်သည်။
လက်နှိပ်စက်စာရေးနှင့် စာရေးကြီးများက ပန်းချီကိစ္စကို ရယ်မောကြလေသည်။ ကိစ္စများအားလုံး ပြီးစီးသည့်အခါ ကျွန်တော်သည် မူမှန်သီချင်းများ ရရှိရေးအတွက် အထက်မြန်မာပြည်အနှံ့အပြားသို့ ပေစာ၊ပရပိုက် ရှာပုံတော်ထွက်ရလေတော့သည်။
ရလာသမျှ ပေစာနှင့်ပရပိုက်များကို စာပေအဖွဲ့သို့ တင်ပြဆွေးနွေးရသည်။ သီချင်းများကို ရွေးချယ်ရသည်။ ဒေါ်ဒေလီညွန့်၊ ဒေါ်တင်အုန်း (ကျွန်တော့်နှမ ) တို့ကို သီဆိုစေပြီး ကျွန်တော်က ဝါးပတ္တလားနှင့် တီးကွက်ကိုလည်းကောင်း၊ တီးကွက်မူကွဲများကိုလည်းကောင်း အသံသွင်းထားရပေသည်။
တီးကွက်အတော်များများ အသံသွင်းထားပြီးသည်နှင့် အထက်မြန်မာပြည်နှင့် အောက်မြန်မာပြည်မှ အနုပညာရှင်ကြီးများအား ပင့်ဖိတ်၍ စုပေါင်းအစည်းအဝေးပြုလုပ်ပြီး အသံတီးကွက်များ နားထောင်ဆုံးဖြတ်ကြပါသည်။
ထိုအစည်းအဝေးပွဲကြီးသို့ တက်ရောက်ကြသူ အနုပညာရှင်များမှာ ရွှေပြည်ဦးဘတင်၊
ဆရာဘလေး၊ မြန်မာညွှန့်ဦးချစ်မောင်၊ ဦးဟန်ပ၊ ဒေါ်စောမြအေးကြည်၊ ဦးဝန် (မင်းသုဝဏ်)၊
ဦးသိန်းဟန် (ဇော်ဂျီ)၊ ဒေါ်ဒေလီညွန့်၊ ဒေါ်တင်အုန်း၊ ဦးကျော်(မန္တလေး)၊ သန်လျင်မြဦးနှင့် ကျွန်တော်တို့ဖြစ်ကြပါသည်။
သင်ရိုးကို ထံတျာတေရှင်မှစ၍ နံပတ်စဉ်ဆုံးဖြတ်ပေးကြပါသည်။ ထို့နောက် သီချင်းစာသားများအတွက် ရွှေပြည်ဦးဘတင်၊ မင်းသုဝဏ်၊ ဆရာဇော်ဂျီ၊ ဦးကျော်(မန္တလေး) တို့ကိုလည်းကောင်း၊ ကျန်ပုဂ္ဂိုလ်များက တီးကွက်စီစဉ်ရန် တာဝန်အသီးသီးပေးအပ်ကြပါသည်။
ဦးဟန်ပ၊ ဦးချစ်မောင်နှင့် ကျွန်တော်တို့က ဆရာမကြီးဒေါ်စောမြအေးကြည်ကို ထံတျာတေရှင်အတွက်
ဒုံးရှစ်ဝါးကိုက်ဖြစ်ရန် ဆွေးနွေးကြသည်။ ဆရာကြီး
ဒေါ်စောမြအေးကြည်က ကန့်ကွက်လက်မခံသဖြင့် ကျွန်တော်တို့ အရှုံးပေးခဲ့ရသည်။
(ဃ) #သုခုမအခြေခံ
၁၉၅၅ ခုနှစ်က မြန်မာနိုင်ငံ ရုပ်ရှင်နှင့် ပြဇာတ်အစည်းအရုံးမှ ကြီးမှူး၍ ဆူးလေဘုရားလမ်းရှိ
ပလေဒီယံ ရုပ်ရှင်ရုံ(ယခုပပ၀င်း ရုပ်ရှင်ရုံ)တွင် ပဒေသာကပွဲကြီး ခင်းကျင်းပြသရာ ကျွန်တော်တို့ ပါဝင်ဆင်နွှဲခဲ့ရသေးသည်။
ရုပ်ရှင်ပြဇာတ်အစည်းအရုံးဥက္ကဌကြီး အေဝမ်းဦးတင်နွယ်၊ စန္ဒရားရွှေပြည်အေးနှင့် ကျွန်တော်တို့သုံးဦးက
"သုခုမအခြေခံ" အမည်ဖြင့် ဂီတသံစဉ်ဖြစ်ပေါ်လာပုံအကြောင်းကို တေးသရုပ်ဖော်အသွင် တင်ပြရန် တာဝန်ယူကြပါသည်။
တရုတ်ပြည်သူ့သမ္မတနိုင်ငံသို့ မြန်မာကိုယ်စားလှယ် အဖွဲ့ဝင်တစ်ဦးအဖြစ်ဖြင့် ပထမအကြိမ်လိုက်ပါသွားခဲ့စဉ်က တရုတ်ပြည်၏ပြဇာတ်၊ ဇာတ်ခုံခင်းကျင်းပြသမှုကို လေ့လာမှတ်သားခဲ့သော အတွေ့အကြုံကို အခြေပြု၍
သုခုမအခြေခံအစီအစဉ်ကိုတီထွင်ပြသရန် ကျွန်တော်ကအကြံပေးပါသည်။ ဦးတင်နွယ်က အခမ်းအနားမွမ်းမံပြင်ဆင်မှုကိုတာဝန်ယူပြီး ရွှေပြည်အေးက ဂီတအစီအစဉ်များကို တာဝန်ယူသည်။ ကျွန်တော်ကိုယ်တိုင် ပဉ္စသိင်္ခနတ်သားအသွင်ဝတ်ဆင်လျှက် စောင်းကိုပိုက်ခါ ဗေလုဝနတ်စောင်းအစချီသော သီချင်းကိုဆိုတီးယင်း အခမ်းအနားအစီအစဉ်ကို စတင်ဖွင့်ရပါသည်။
စန္ဒရားရွှေပြည်အေးက မြ၀တီမင်းကြီးဦးစ၏
ဂီတသံစဉ်ရှာဖွေတီထွင်ဟန်ကို သရုပ်ဖော်နေစဉ်
အသံစဉ်များကို နိုင်ငံခြားပတ္တလားဖြင့် ရှာဖွေနေရာမှ အသံများပျောက်သွားခဲ့ရာ ကျွန်တော်က ပဉ္စသိင်္ခအဖြစ်နှင့် သူပျောက်နေသောသံစဉ်များကို စောင်းနှင့်တီးပြီး ပြန်လည်ဖော်ထုတ်ပေးခဲ့ရပါသည်။
ထိုသို့အသံစဉ်များ ပေါ်ထွက်လာပြီးနောက်
ဆိုင်းပစ္စည်းများတီထွင်သည့်သရုပ်ဟန်ပြလိုက်ပြီး ခေတ်ပေါ်တူရိယာများဖြင့် ဆက်လက်တီထွင်၍ သရုပ်ဖော်ပြကွက်များ တင်ဆင်ပါသည်။
"ဒို့စိန်ကုလား "ဆိုင်းအဖွဲ့ ၊ခေတ်ပေါ်တူရိယာအဖွဲ့တို့နှင့်အတူ ကျွန်တော်ကိုယ်တိုင်စောင်းတီး၍
ပရိတ်သတ်အားတင်ဆက်ရာ တစ်ခဲနက်သော
သြဘာလက်ခုပ်သံများဖြင့် အားပေးကြပါသည်။
(အပိုင်း ၅ ပြီး၏)
အားလုံးသောမိတ်ဆွေများပညာသုတပြည့်ဝကြပါစေ..
(အပိုင်း ၆ ဆက်လက်ဖော်ပြပါမည်)
#စောင်း #မြန်မာ့စောင်း #မြန်မာ့ယဉ်ကျေးမှု #မြန်မာ့ဂီတ #စောင်းသင်တန်း #စောင်းအွန်လိုင်းသင်တန်း ြန်မာစောင်းရောင်းဝယ်ရေးလုပ်ငန်း
#ရန်ကုန် #မဟာဂီတ #မြန်မာ့ရိုးရာ #စည်းနဲ့ဝါး #စောင်းဦးဘသန်း
