04/10/2023
ඔයාලට ළඟදී වට්ස් අප් මැසේජ් එකක් ආවද ? මෙන්න මෙහෙම කියල.
"ඔන්ලයින් බිස්නස් එකක් තියනවා, දවසට රුපියල් තිස් හතලිස් දාහක් උපයන්න පුළුවන්"
එහෙම මැසෙජ් එකක් ආවෙ නැත්නම් ළඟදීම එයි.
නොරැවටී ඉන්න ආස අය මේ ලිපිය ඉදිරියට කියවගෙන යන්න. විනාඩි දෙක තුනක් මේක කියවන්න වැය කළාට පාඩුවක් නෑ. ඉදිරියට කියවගෙන යන්න.
කවුද ඉතිං අකමැති නිකන් ඉඳල දවසට රු. තිස් හතලිස් දාහක් ගන්න නේද ?
ඒ නිසා ගොඩක් අය කැමතියි කියල කියනවා.
ඊට පස්සේ ඔයාලා ටෙලිග්‍රෑම් ගෲප් එකකට ඇඩ් කරනවා. ඒකට ඇඩ් වෙලා බැලුවාම මල් හතයි. ඒකට වැටෙනවා මෙන්න මෙහෙම මැසේජ් ගොඩාාාාරියක්.
"මම ටාස්ක් එක සම්පූර්ණ කල නිසා මට රු. X ගාණක් කමිෂන් එක ලැබුනා"
ඔකේ "X" වෙනුවට එක එක ගණන් තියෙයි.
දැන් ඉතිං අපේ එවුන්ට ඉන්න බෑ මේ වගේ නිකන් ඉඳලා කීයක් හරි හම්බ කරනකන්. ඉතිං එයාලා ඔයාට මේ වැඩේට සම්බන්ධ වෙන්න කියල කියන්නත් කලින් ඔයාලම අහනවා "අනේ කොහොමද මේකට සම්බන්ධ වෙන්නේ" කියල.
නැතුව බැහැනේ නේද ? අහන්න එපායැ !!!
ඊට පස්සේ එයාල ඔන්න වැඩේ විස්තර කරනවා ඔයාට. නිකන්ම නෙවෙයි හරිම ආදරණීය විදිහට. ආස හිතෙන විදිහට.
"අපි ඔයාට දෙනවා ටාස්ක් කිහිපයක්, ඒ ඒ ටාස්ක් එක සම්පූර්ණ කළාම ඔයාට ඒකට කමිෂන් එකක් ඔයාගේ ගිණුමට දානවා"
එතකොට ඔයාලා අහනවා "අනේ මොනවද අපිට දෙන ටාස්ක්" කියල. අහන්නෙත් නිකන් නෙවෙයි එයාල ඔයාට විස්තර කලා වගේම හරිම ආදරණීය විදිහට. ඇයි ඉතිං නිකන් ඉඳල මාසෙට රු. ලක්ෂ දොළහක් පහළවක් ලැබෙනවා නම් ඉතිං ආදරණීය වෙන්න එපායැ නේද ? දවසට රු. 40,000 ක් කියන්නේ මාසෙට ලක්ෂම 12 ක් නෙව !!!!
අනිත් වැදගත්ම දේ තමයි මේ ස්කෑම් එකේ සෙනසුරාදා ඉරිදා කියල නෑ. හැමදාම පොපිටි හම්බෙනවා !!!
මුලදී දෙන්න හරිම ලේසි, ආාාස හිතෙන ටාස්ක්. ලෝකේ ප්‍රසිද්ධ නළුවෙක්, නිළියක්, ගායකයෙක්, ගායිකාවක්, ක්‍රීඩකයෙක්ගේ ෆේස්බුක්, ඉන්ස්ටග්‍රෑම් ප්‍රොෆයිල් එකක ලින්ක් එකක් එවල ඒක ෆලෝ කරන්න කියනවා. ඒකේ තියන පෝස්ට් වලට ලයික් කරන්න කියනවා.
හරිම ලේසි ටාස්ක් නේද දෙන්නේ ? ලේසිනම් විතරක් මදෑ !! එහෙම කලාම රුපියල් දෙතුන් සීයක්, හත් අට සීයක් ඔයාගේ ගිණුමට කමිෂන් එකකුත් දානවා.
දැන් ඉතිං ලෝකෙම හම්බ උනා වගේ තමයි. විශ්වාසය උපරිමයි. තවත් ඒ වගේම සීනි බෝල ටාස්ක් එකක් ඔයාට ලැබෙනවා. ඒකෙන් පස්සේ මෙන්න බොලේ ආපහු කමිෂන් එකක් වැටිලා. ඒ අයියට කමිෂන් එක ඔයාට දැම්මා කියල කියන්නත් අමතක වෙලා. ඔයාම ඒක දැනගත්තාම ඔයාට තවත් සැටිස්.
පොඩි මාළුවෙක් ඇමට දාලා ලොකු මාළුවෙක් බිලී බානවා වගේ වැඩක් තමයි මෙයාලා කරන්නේ. පොඩි කමිෂන් එකක් දීලා ලොකු ගාණකට තට්ටු කරනවා.
පිරමීඩ වලට පහුගිය කාලේ ලොකුවට අහු වෙලා සේසතම නැති කරගත්තේ මෝඩ මිනිස්සු කියලද හිතන්නේ ? අනේ නෑ. ගුරුවරු, ලිපිකරුවන්, ත්‍රිවිධ හමුදා සාමාජිකයන්, පොලිස් නිළධාරීන්, හෙද හෙදියන් තමයි මේවට වැඩ්පුර අහු උනේ. ගොඩක් වෙලාවට බිස්නස් කරන අය මේකට අහු උනේ නෑ. ඇයි දන්නවද ?
#නිකන්ඉඳලසල්ලිහොයන්නබැරිබවඑයාලදන්නනිසා!!!
ඔහොම සීනිබෝල ටාස්ක් කීපයක් දීලා බලනවා #කියන ඕන දෙයක් කරන්න තරම් තඩි ගොනෙක් ඔයාගේ ශරීර කූඩුව ඇතුළේ ඉන්නවද කියල.
එහෙම වස්සෙක්, වැස්සියක් ඔයා ඇතුළේ ඉන්නවා කියල ඔයාලා ඔප්පු කළොත්, ඊළඟ ටාස්ක් එක හරිම රසවත් එකක් විදිහට තමයි ලැබෙන්නේ.
"රුපියල් අටදාස් නවසිය දෙකක් (මතක තියා ගන්න රවුම් ගණන් නෙවෙයි කියන්නේ ඇද වෙච්ච ගණන් තමයි කියන්නේ. ඇයි ඉතිං ප්‍රොෆෙෂනල් විදිහට පෙන්වන්න එපැයි නේද ?) අපි කියන ගිණුමට තැන්පත් කරන්න එතකොට ඔයාට රු. 2,000 ක කමිෂන් එකක් එනවා කියල කියනවා.
ඔයා දැන් ඉන්නේ ඒ අයියා කියන ඕනම දෙයක් කරන මානසිකත්වයක. ඔයා ඒ කියන ගාන තැන්පත් කරනවා නෙවෙයි ඉබේම තැන්පත් වෙනවා. දැන් කාලේ ඉතිං ATM කාඩ්, ඇප්, ඉන්ටර්නෙට් බෑන්කින්, SMS බෑන්කින් වගේ හැටහුටහමාරක් තියන එකේ රෑ. 12 ට යක්කු ගස් යන වෙලාවක උනත් ඕක කොරන්න බැරියැ නේද ?
ඒක තැන්පත් කලාම ඔයාට අර කීව කමිෂන් එක ලැබෙනවා.
ඊට පස්සේ කියනවා අර කලින් තැන්පතු කරපු අටදාස් ගානටත් වඩා කමිෂන් එකක් ලැබෙන්න නම් රු. 53,250 ක් වගේ ඇද ගානක් දාන්න කියල.
ඔයා මොකද කරන්නේ ? දානවා නේද ? ඔවු. ඔවු දානවා. දානවා නෙවෙයි දැමෙනවා.
ඊට පස්සේ කියනවා ඒ 53 දාස් ගාණටත් වඩා කමිෂන් එකක් එන්න නම් 149,300 ක් දාන්න කියල. හා අපි නොදා ඉඳියි ද ?
දැන් නම් හමහරුන්ට හිතෙන්න පුළුවන් මෙහෙමත් සල්ලි දානවද කියල. දානවා දානවා. අදත් (2023 10 02) එහෙම සල්ලි දාපු කෙනෙක්ගේ පැමිණිල්ලක් ආවා. ඒ නිසා දිගටම මේක කියවන්න.
ඊට පස්සේ ඒ ගානටත් වඩා කමිෂන් එකක් එන්න නම් හාරලක්ෂ ගාණක් දාන්න කියනවා.
මේක සුපිරියටම වැදගත් විදිහට තමයි කෝල් කර කර කියන්නේ. පැණි බේරෙන්න, සැක නොහිතෙන්න.
ඔය විදිහට ඔයාල හාවෝ කරල ගන්න සල්ලි වලින් තමයි අර කියපු පොඩි පොඩි කමිෂන් ඔයාලටම දාන්නේ.
ඔයා ඔය විදිහට රැවටිලා සල්ලි දාන ගිණුම තියනවා නේද ? ඔයා හිතන්නේ ඒ දාන කෙනා ඔයාව රැවැට්ටුවා කියලද ?
නෑ. කොහෙත්ම නෑ. එයාත් ඔයි වගේම හාවෙක්. එයත් මං මුළාවූ සමනළියෙක් හෝ සමනළයකේ. තමන්ගේ ඇඟ ඇතුලේ ලොකූ ගොං වස්සෙක් ඉන්නවා කියල ඔයාටත් කලින් ඔප්පු කරපු කෙනෙක්.
එයා ඒ සල්ලි වෙන කෙනෙකුට ට්‍රාන්සර් කරනවා. දවසට හත් අට වතාවක් ට්‍රාන්සර් කරනවා. එහෙම ට්‍රාන්සර් කරන ගිණුමේ අයිති කාරයා ඉන්නවා නේද ? එයගේ ඇඟ ඇතුළෙත් තඩි වස්සෙක් ඉන්නවා. එයත් ඒ මුදල තව ගිණුමකට ට්‍රාන්සර් කරනවා.
ඔහොම ට්‍රාන්සර් වෙලා වෙලා ඔය සල්ලි ටික අවසානෙටම යන්නේ කැනඩාවේ හෝ ඇමරිකාවේ ඉන්න කෙනෙක්ගේ නමට තියන ගිණුමකට. ඒ ගිණුම අයිති කෙනා ගැන ලංකාවේ මේකට අහු වෙච්ච වස්සෝ වැස්සියෝ දන්නේ නෑ කවුරුත්ම.
එයාලා මුලදීම ඔයාලට කියනවා එයාලගේ කම්පනී එකේ නම. සමහරු ඒ නමින් සර්ච් කරල බලනවා. එහෙම කම්පැනියක් තියනවා. ඉතිං මොකට සැක කරන්නද නේද ?
එහෙම කම්පැනියක් තිබුනට කවුද කල්පනා කරල බලන්නේ මේ කතා කරපු කෙනා ඒ කම්පැණියේ කෙනෙක්මද කියල ? එහෙම කල්පනා කරන්නේ නෑ. ඇයි, තඩ් ගොං නාම්බෙක් අපේ ඇඟ ඇතුළේ ඉන්නවනේ !!!
දැන් ඔන්න ඔයාලා ගිහින් බැංකුවට කියනවා විස්තරේ. අපේ සල්ලි අරන් දෙන්න බැරිද කියල අහනවා.
අරන් දෙන්න අර ගිණුමේ සල්ලි තියෙන්න එපායැ. ඔයාලා සල්ලි තැන්පත් කරපු ගිණුමේ සල්ලි දවසට හත් අට වතාවක් වෙන ගිණුමකට මාරු කරලා. ඒ මිනිහත් මේ වැඩේට අහු වෙච්ච එකෙක්. දුප්පතෙක් නම් නෙවෙයි, තඩි හරකෙක් ඇඟේ ඉන්න එකෙක්. මේ කාලේ ලොකූ හරකෙක්ම ලක්ෂ තුන හතරක් වෙනවා. ඉතිං කොහොමද දුප්පතෙක් වෙන්නේ ?
පහුගිය කාලේ ලාංකිකයෝ ගොඩාරියක් ඊජිප්තු පුරවැසියෝ බවට පත් වෙලා පිරමීඩ හදන්න දායක උනා. කවුද කන්නවද වැඩිපුර ඊජිප්තු පුරවැසි භාවය ගත්තේ ? වියළි කලාපයේ අය. අනුරාධපුරේ, පොළොන්නරුවේ, කැබිතිගොල්ලෑවේ, හොරොව්පතානේ, පුත්තලමේ, ආණමඩුවේ, හලාවත, නිකවැරටියේ, මහව, ගල්ගමුවේ අය. දැන් ඉතිං තෙත් කලාපේ එවුන් මේක අල්ලන් පෝස්ට් හදනවා එහෙම නෙවෙයි. ටීකක් අඩුවෙන් නමුත් උනුත් මේකට අහු උනා.
අවසානෙට කියන්න තියෙන්නේ මෙච්චරයි. උඹලට පිරමීඩයක් යනු කුමක්ද කියල තේරුම් කරනවට වඩා ලේසියි හරකෙක්ට අවකලනය උගන්වන එක. උඹලට ඕක තේරුම් කරන්න ගියාම අපේ ඇඟට කඩා පණිනවා. අපි මොකටද විකන් ගුටි කන්නේ ?
ඒ හින්දා කෙටියෙන් මෙහෙම කියන්නම්.
නිකන් ඉඳලා මාසෙට ලක්ෂ ගණන් පොපිට් එන්නේ රැවටිලිකාර බිස්නස් වලින් විතරයි. එතන වංචාවක් තියනවාාාාාාාාම තමයි.
ලංකාවේ කිසිම මිනිහෙක් තමන් කරන බිස්නස් එක ලාභද, පාඩුද කියල ඇහුවාම ලාභයි කියල කියන්නේ් නෑ. "අනේ මෙලෝ රහක් නෑ. අපිත් කරනවට කරනවා. හිතුනොත් ළඟදීම මේ බිස්නස් එක නවත්වනවා" කියල තමයි කියන්නේ.
ඒ තමයි සිංහල ගතිය. එහෙව් රටේ කවුරු හරි කෙනෙක් ඇවිත් බලෙන් ඇඟේ හැප්පි හැප්පී කියනවා නම් "පට්ට ලාබ බිස්නස් එකක් තියනවා, සෙට් වෙමුද" කියල,
ආයෙ හිතන්න දෙයක් නෑ. ඒක පිරමීඩයක්ම තමයි. ඉතිං ඔයාල තීරණය කරන්න රජක්ට තමන්ගේ ජීවිතය සැපවත් කරගන්න, මරණින් පසු ආත්ම වලට පවා මේ ආත්මේ විඳපු සැප අරන් යන්න දායක වෙන්න පිරමීඩයක් හදල දෙනවද කියල !!!
මම නම් දෙන උපදේශය, මරණින් පස්සේ තමන්ගේ දරුවන්ට දීලා මැරෙන්න පුළුවන් බිස්නස් එකක් හදන්න. පිරමීඩ වලට රැවටෙන්න එපා. පිරමීඩ කියන්නේ බිස්නස් එකක් නෙවෙයි වංචාවක්. සිංහල මිනිස්සුන්ට බිස්නස් කීව ගමන් මතක් වෙන්නේ පිරමීඩයක්. ඒක තමයි කරුමේ කියන්නේ. සමහර ව්‍යාපාර ආයතන වලට ගියාම මුණුපුරා බිස්නස් එක කරන් යනවා. කැෂියර් එකට උඩින් තාත්තගෙයි සීයාගෙයි ෆොටෝ එකක් ගහල පහණක් පත්තු කරල තියනවා දැකල ඇති නේද ? ආන්න නියම බිස්නස් කාරයෝ. මරණින් පස්සෙත් ජීවත් වෙන්න නම පවතින වැඩක් කරපු අය. ඒ වගේ දියුණු කරන්න හිතාගෙන පොඩිවට බිස්නස් එකක් පටන් ගන්න. පිරමීඩ වලට අහුවෙන්න එපා.
තේරෙන්නැත්නම් ඔය ඔන්ලයින් මඟුල් වලට යන්නම එපා. වෙනදා වගේ ජීවත් වෙන්න. භාණ්ඩ ලැබුන පසුව පමණක් මුදල් ගෙවන තැන් එක්ක විතරක්ම ගණුදෙණු කරන්න. වෙන මුකුත් ඔන්ලයින් වැඩ කොරන්න යන්න එපා.
මේ දවස් වල දරුණුවටම යන බිස්නස් එකක් මේක. අහු වෙන්න එපා. හැකි තරම් ෂෙයා කරන්න.
Copied
ක්‍රිෂාන්ත දිසානායක
