27/05/2026
🎈突發快閃優惠和菓子體驗班原滿結束🫶🏻
佛誕連假呢兩日,真係過得好充實,好滿足。當初話想任性一次,破天荒出個 $380 嘅快閃新手班,其實臨出 Post 前我都幾忐忑。點知你哋真係超熱烈！不單止 4 班全部爆滿,成個過程順利到不得了！最令我驚喜嘅係,今次真係好多同學仔都係不折不扣嘅「真・新手」,甚至連和菓子係咩都未搞得好清楚就衝過嚟支持。但我同你哋講,你哋真係個個都超叻豬！🐷✨ 原本好擔心 2 小時會唔會好趕,點知大家執起工具個樣勁認真,聽我講步驟又聽得超專心。最緊要係大家真係一學即識、Pick up 得快到嚇親我！睇返大家整好嗰 4 件富士山同櫻花成品,每件個線條都好靚、好到位。邊個話零基礎整唔到靚嘢架？🤓你哋呢兩日直頭係民間高手呀！
雖然今次係特平嘅快閃班,但大家知我平時作風,我絕對唔會因為收得平就 hea 教。平時正規班我堅持 小班教學，今次快閃班我都一樣無變,絕對唔會一班收10個16個、甚至 20 個人。因為對我嚟講,每一位報名嘅同學都好重要。維持小班我先可以真正用心地睇住每一個人嘅進度,幫你哋一對一微調手勢、執返好捏塑嘅技巧,保證每個人帶走嘅作品都係最完美嘅狀態。而事實亦都證明左, 睇下你地D成品就知啦☺️☺️
兩日同咁多人一齊一邊整一邊傾計, Studio 滿滿都係笑聲, 真係好治癒🥰好多同學都同我坦白：話其實平時見我D 班覺得好靚、好想試玩, 但證書班要上一整日、好似好複雜, 好驚自己手殘跟唔到, 所以一直都唔敢報名…… 🥺聽到你哋咁講，我突然覺得今次任性開呢個低門檻嘅體驗班真係做岩左💡 嚟緊我嘅小打算：你哋嘅心聲我全部聽晒😌見到大家透過呢 2 鐘頭重新搵到手作仔嘅樂趣,認真考慮緊遲下會再出多 D 呢類型「時間短、無負擔、價錢親民」嘅新手快閃班。等想接觸和菓子美學嘅朋友可以無壓力試玩先, 玩到真係起晒癮、想深造專業技術嘅時候，先再考慮職人證書班😘 再次多謝呢兩日過嚟玩嘅大朋友小朋友🎁 期待好快又可以喺 Studio 見到大家！
今次報唔到嘅同學仔記得緊貼我地ig/threads 留意突發快閃團啦😆😆🎉
👉 如果再出快閃班, 你哋最想試玩乜野款式？（寒天、貓貓團子、銅鑼燒、葛菓子、外郎）喺下面留言話我知啦🤓
#快閃優惠 #香港工作坊 #練切 #香港和菓子
