21/07/2026
کراچی پولیس نے کیماڑی میں 4 مارچ کو 16 سالہ لڑکی آرمیش کی فلیٹ سے پھندا لگی لاش ملنے کے اندھے قتل کا معمہ حل کرتے ہوئے مرکزی ملزم کو گرفتار کر لیا۔
پولیس کے مطابق مقتولہ کی لاش اس کے بیڈ پر پھندا لگی حالت میں ملی تھی، جس پر مقتولہ کی والدہ کی مدعیت میں نامعلوم ملزمان کے خلاف مقدمہ درج کیا گیا تھا۔ مرکزی ملزم فیضان کو گرفتار کر لیا۔
پولیس کے مطابق گرفتار ملزم مقتولہ کا سابق منگیتر اور قریبی رشتہ دار ہے، جو منگنی ختم ہونے اور مقتولہ کی دوسری جگہ منگنی طے ہونے پر رنجش رکھتا تھا۔ تحقیقات میں انکشاف ہوا کہ وقوعہ کے روز مقتولہ کی والدہ ملازمت پر گئی ہوئی تھیں، اسی دوران ملزم فلیٹ میں داخل ہوا اور مبینہ طور پر زیادتی کے بعد مقتولہ کا گلا دبا کر قتل کر دیا۔
پولیس مطابق مقتولہ اپنے مرحوم والد کے انتقال کے بعد والدہ کے ساتھ رہائش پذیر تھی، جبکہ ملزم بھی اپنے اہل خانہ سمیت اسی رہائشی عمارت کی بالائی منزل پر رہتا تھا۔ واردات کے بعد ملزم نے خود پر شبہ ختم کرنے کے لیے پولیس کے ساتھ مل کر ملزمان کی تلاش میں بھی حصہ لیا۔
پولیس کا کہنا ہے کہ تفتیش کے دوران سامنے آنے والے شواہد کی بنیاد پر مقدمے میں تعزیراتِ پاکستان کی دفعہ 376 بھی شامل کر دی گئی ہے، جبکہ ملزم کو عدالت میں پیش کر کے جسمانی ریمانڈ حاصل کیا جا رہا ہے۔
