12/09/2024
မိုးများသဖြင့် ရှေးဟောင်းပုဂံဘုရား ၂ ဆူ ပြိုကျ
# # # # # # # # # # # # # # # # # # # # # # # # # # # # # # # # # # # # # # # # # # # # #
မိုးအဆက်မပြတ်ရွာသွန်းမှုကြောင့် မန္တလေးတိုင်း၊ ညောင်ဦးမြို့နယ်၊ ပုဂံရှေးဟောင်းယဉ်ကျေးမှုနယ်မြေအတွင်းရှိ ရှေးဟောင်းဘုရားနှစ်ဆူ ပြိုကျသွားကြောင်း ဒေသခံထံမှ သိရသည်။
ယနေ့ (စက်တင်ဘာ ၁၂ ရက်)တွင် ပုဂံမြို့သစ်၊ ကျန်စစ်နယ်မြေ၊ ရွှေလောင်းရပ်ကွက်ရှိ ဘုရားအမှတ်(၁၀၄၂) ၊ ဆင်ကဘုရားနှင့် ငှက်ပစ်တောင်ပေါ်ရှိ ဘုရားအမှတ်(၁၆၇) စေတီကြီးဘုရားတို့ သည် မိုးအဆက်မပြတ်ရွာသွန်းကာ မိုးရေစိမ့်ဝင်မှုကြောင့် ဘုရားပြိုကျသွားခြင်းဖြစ်ကြောင်း သိရသည်။
ဆင်ကဘုရားသည် ဘုရားအဆောက်အအုံတခုလုံး ပြိုကျခဲ့ခြင်းဖြစ်ပြီး စေတီကြီးဘုရားသည် ဖောင်းတန်းပစ္စယံနေရာမှ ပြိုကျခြင်းဖြစ်ကြောင်း သိရသည်။
ဆင်ကဘုရားကို ဆင်က အုတ်ရှည်တိုက်ဟုလည်းခေါ်ဆိုကြရာ ပြီးခဲ့သည့် ၂၀၂၁ ခုနှစ် စက်တင်ဘာ ၁၁ ရက်နေ့တွင်လည်း ဘုရား၏အနောက် တောင်ထောင့်စောင်းတန်း ပြိုကျမှုဖြစ်ပွားခဲ့သေးသည်။
ပြိုကျထားသည့် အုတ်စီအုတ်နင်းများတွင် ရေဝင်-ရေဝ ထားတဲ့ လက္ခဏာတွေ့ရပြီး ဘုရားပြိုကျရသည့် အကြောင်းအရင်းများမှာ လေထုထဲတွင် ရေခိုးရေငွေ့ပါဝင်မှုနှုန်းများခြင်း၊ လုံလောက်သည့် နေရောင်ခြည်နှင့် အပူဓာတ်မရခြင်းတို့ကြောင့်ဖြစ်ကြောင်း ရှေးဟောင်းယဉ်ကျေးမှုအမွေအနှစ် ထိန်းသိမ်းရေးပညာရှင် ကိုဇေမျိုးလင်းက ၎င်း၏လူမှုကွန်ရက်တွင် ထောက်ပြထားသည်။
“အုတ်သားထုက အသက်ဝဝ ရှူလို့မရတဲ့ လက္ခဏာတွေ့ရတယ်။ ကိုယ်ထည်ထဲဝင်နေတဲ့ ရေခိုးရေငွေ့ကို နေပူတဲ့အချိန်၊ ရာသီဥတုပူတဲ့ အချိန်မှာ အငွေ့ပျံသွားအောင် မထုတ်နိုင်တော့တာ၊ မြေသားအင်္ဂတေရဲ့ တွယ်ကပ်၊ တွယ်ကုပ်နိုင်မှု စွမ်းအားမရှိတော့ဘူး။ သာမန် ရွှံ့စေးမြေသာသာဖြစ်လာတာ၊ မိုးရွာတဲ့အခါ မိုးကျတဲ့ဒဏ်ကို ၂၄ နာရီလောက် ခံရတဲ့အခါ ဘုရားကိုယ်ထည်၊ အုတ်သားထုကိုယ်ထည်ဟာ မိုးရေဒဏ်ကို ထိန်းမထားနိုင်တော့တာတွေကြောင့် ပြိုကျတယ်” ဟု ကိုဇေမျိုးလင်းက မှတ်ချက်ပြုသည်။
ပုဂံတွင် မိုးအဆက်မပြတ်ရွာသွန်းနေသည်မှာ သုံးရက်ခန့်ရှိနေပြီဖြစ်ပြီး ယနေ့ထိ မိုးဆက်လက်ရွာသွန်းနေဆဲဖြစ်သဖြင့် အခြားရှေးဟောင်းဘုရားများအတွက်လည်း စိတ်ပူနေရကြောင်း ဒေသခံတဦးက မဇ္ဈိမကို ပြောသည်။
“မိုးကောင်းနေတာ သုံးရက်လောက်ရှိပြီ။ အဲ့အရင်ရက်တွေက နဲနဲရွာလိုက် ရပ်လိုက်နဲ့။ ခုတော့ သုံးရက်ဆက်တိုက်၊ ခုထိမိုးကောင်းတုန်း။ အရင်တုန်းက ခဏခဏပြိုတယ်” ဟု ဒေသခံတဦးက ပြောသည်။
ပုဂံ ရှေးဟောင်းယဉ်ကျေးမှုအမွေအနှစ်ဇုန်တွင် ရှေးဟောင်းဘုရား စေတီပုထိုးပေါင်း ၃,၀၀၀ ကျော်ရှိပြီး ယခုကဲ့သို့ မိုးများသည့် ကာလဖြစ်ပါက နှစ်ပေါင်း ၁,၀၀၀ ကျော် သက်တမ်းရှိသော ရှေးဟောင်းပုဂံဘုရားများအတွက် စိုးရိမ်စရာ ဖြစ်နေသည်။
Credit - Mizzima
