22/06/2023
အဖေ(သို့)ကျနော့်ကဗျာ
________________________
တွဲရိုက်ဖူးတဲ့ ဓာတ်ပုံတောင် မရှိတဲ့ကောင်ဟာ
ကွဲခဲ့ မိုက်ခဲ့မိတဲ့ အချိန်တွေမှာ
အဖေလို့ တခါမှ မတ,ခဲ့မိရိုးအမှန်ပါအဖေ
ဘယ်က ပြန်လာပြန်လာ
" ဘယ်မှာလဲ အမေ " ဆိုတာ အဖေ့ကိုမြင်တိုင်း
မေးနေကျစကားပါ
တခြားကမ္ဘာကလာတဲ့ ဂြိုလ်သားလို့ ထင်ရအောင်
အပိုစကား မဆိုတဲ့ အဖေ့အနား
ပလီပလာ တီတီတာတာ
ရစ်တွယ်မနေရဲတာ ခွင့်လွှတ်ပါအဖေ
အဖေ့စက်ဘီး ဘာတန်းလေးပေါ်
ထိုင်စီးရတဲ့ ညနေခင်းတွေ
အဖေ့ လဘက်ရည်ခွက်ထဲကနေ
ပန်းကန်ပြားထဲ ငှဲ့တိုက်ခဲ့ဖူးတဲ့ လဘက်ရည်ချိုဆိမ့်ဆိမ့်တွေ
နေ့ရက်တိုင်းဟာ လှပနေဆဲပါပဲအဖေ
ဘဝမှာ အဖေနဲ့ ပက်သက်သမျှအရာရာ
အဖေ့အတွက်သိမ်းထားဆဲပါ
အဖေ့ဖုန်းကို ဘယ်သားသမီးမှ မခေါ်ဘူးလို့ အဖေပြောတဲ့နေ့ဟာ
ဘဝမှာ ရင်နာရဆုံးအခိုက်တန့်ပါပဲအဖေ
ဘာအကြောက်ဆုံးလည်းမေးရင်
ဖုန်းမှတ်စုထဲက ဖေဖေ ဆိုတဲ့ ဖုန်းနံပါတ်လေး
ဘယ်တော့မှ မကိုင်တော့မှာ အကြောက်ဆုံးပါ
ဘဝမှာ အကြားချင်ဆုံးသော ဘာသာစကားဟာ
အဖေ့ဆီက ချစ်တယ်ဆိုတဲ့စကားပါပဲ
အဖေလည်း ဒီစကားကိုပဲ မျှော်လင့်နေမှာသား သိပါတယ်အဖေ
ဘဝမှာ အဖေ့ကို ချစ်တယ်လို့
အဖေ့မျက်နှာ စေ့စေ့ကြည့်ပီး
ရဲရဲကြီးပြောရဲတဲ့ သတ္တိမျိူး
သား ပိုင်ဆိုင်ဖူးချင်ပါတယ်အဖေ
အဖေဟာ အရာရာဖြစ်ခဲ့သလို
အဖေဟာ ကဗျာဖြစ်နေဆဲပါ
"အဖေ့ကို အရမ်းချစ်တယ် အဖေ "
ဒီစကားဟာ ကျနော်မသေခင်
အဖေနာကြားရမယ့် တရားပဲဖြစ်တယ် ။။။
#လင်းညီဇင်
